Eze 2 | MEU | STEP | Bena ia ese e hamaorogu, eto, Taunimanima natuna e, a gini tore, bena baina hereva henimu.

Ezekiel 2

Esekiel iboirina

1 Bena ia ese e hamaorogu, eto, Taunimanima natuna e, a gini tore, bena baina hereva henimu. 2 Ia ese e hereva henigu negana ai, Lauma ese e rohegu bona e haginigu tore, bena ma na kamonai, e hereva henigu. 3 Ia ese e hamaorogu, eto, Taunimanima natuna e, Israel taudia dekedia na siaimumu, daḡedaḡe besena, lau e daḡedaḡe henigumu taudia, dekediai; idia bona tamadia ese vada e kara dika henigu ema bona hari ina dina ai. 4 Unu taunimanima danu asie matauraigumu, bona lalodia e ha-aukadiamu; dekedia na siaimumu, ba hamaorodia, baoto “Ḡaubada Iehova na ini e gwau tomamu”. 5 Bena bema kamonai eiava basiema kamonai (badina be idia na daḡedaḡe besena), to vada bae diba peroveta tauna ta na idia bogaragidiai vada ema. 6 Oi danu, taunimanima natuna e, idia garidia basio gari bona edia hereva basio garilaidia; ena be au ginigini bona ava ginigini na emu ai bona doadoa o helaidia taomu, to edia hereva garidia basio gari bona edia vaira-hua basio garilaia, badina be idia na daḡedaḡe besena. 7 Egu hereva ba hamaorolaidia, bena bae kamonai eiava kamonai basie ura; badina be idia na daḡedaḡe besena.

8 A taunimanima natuna e, na hamaorolaimumu herevana ba kamonai: oi na basio daḡedaḡe, una daḡedaḡe besena na heto; udumu a hagaia, aina henimu ḡauna bavania. 9 Bena na roha lao, ima ta na itaia, e hetoi roro henigu, bona lalonai na pepa mai revarevana helokuna ta. 10 Bena ia ese lau vairagu ai e hulalaia: pepa kahana kahana na mai revarevadia, unu kaha ruaosi ai herohe-ahu bona taitai bona lalo-hisihisi herevadia vada e hetore.